By mustapha Abdullahi Abubakar
Dakarun rundunar Operation ENDURING PEACE, tare da haɗin gwiwar ƙungiyoyin sa-kai na tsaro (vigilante), sun samu nasarar kashe adadi mai yawa na ‘yan ta’adda a wani samame na haɗin gwiwa da suka kai a ƙauyukan Daba da Seri da ke ƙananan hukumomin Wase da Kanam a Jihar Filato.
Wannan farmaki na daga cikin ci gaba da hare-haren tsaftace yankuna da ake gudanarwa ƙarƙashin shirin Operation WUTAN DAJI, wanda ke nuna ƙudirin sojoji na dawo da tsaro a hanyoyin da aka gano ‘yan ta’adda na amfani da su.
Da misalin ƙarfe 8:30 na safe a ranar 9 ga Afrilu, 2026, dakarun sun kafa muhimman wuraren shinge tsakanin Dutsen Zaki da dajin Odare. A yayin aikin, an hango gungun ‘yan ta’adda masu yawa suna tafiya a kan babura ta wata hanya da suka saba bi, inda dakarun suka gaggauta buɗe musu wuta cikin tsari da ƙwarewa.
Duk da cewa ‘yan ta’addan sun yi yunƙurin ƙwacewa da farko, ƙarfin wutar dakarun ya rinjaye su, lamarin da ya kai ga kashe ‘yan ta’adda guda 10, yayin da wasu suka tsere cikin rudani zuwa cikin daji suna barin gawarwaki a baya.
A wani cigaban kuma, bayan samun rahoton wani hari da aka kai wa matafiya a kan hanyar Razat zuwa Kafi Abu, dakarun sun ƙaddamar da wani sabon samame cikin gaggawa domin fatattakar masu laifin.
Da zarar an fara arangama, maharan sun ja da baya zuwa cikin karkara, lamarin da ya sa jami’an tsaro suka bi sawunsu domin tabbatar da dawo da zaman lafiya.
A cikin jerin ayyukan haɗin gwiwa, dakarun sun gudanar da bincike mai zurfi a ƙauyukan Suma Suga da Takwok, da kuma tsaunukan da ke kewaye da su.
Wannan aiki ya kai ga gano muhimman makamai da kayayyakin leƙen asiri da ‘yan ta’addan suka bari yayin da suke tserewa.
Daga cikin kayayyakin da aka kwato akwai bindigogi kirar AK-47 guda 3, magazin guda 3, harsasai na musamman 7.62mm guda 8, babura guda 2, da galan guda 5 na man fetur (lita 25 kowanne) da aka tanada domin ayyukan su.
karanta:Mutane sun tsere daga kauyuka 21 a Sakkwato saboda barazanar ’yan bindiga
Haka kuma, an samu katin shaidar ɗan ƙasa da hoton wasu daga cikin waɗanda ake zargi, wanda hakan zai taimaka wajen ci gaba da bincike.
Wannan nasara wata babbar mataki ce wajen rage ƙarfin ayyukan ƙungiyoyin ‘yan bindiga a yankin. A halin yanzu, dakarun na cikin shirin ko-ta-kwana tare da ci gaba da farautar waɗanda suka tsere da kuma masu taimaka musu.
Rundunar Operation ENDURING PEACE ta tabbatar da cewa za ta ci gaba da ƙara kaimi a ayyukan tsaftace yankuna tare da mamaye wuraren da aka gano suna da haɗari, domin tabbatar da kare rayuka da dukiyoyin al’umma
Recent:TROOPS NEUTRALIZE TERRORISTS, RECOVER ARMS IN PLATEAU