Daga Mustapha Abdullahi Abubakar
Yayin da al’ummar Musulmi ke bikin kammala azumin watan Ramadan tare da gudanar da Sallar Eid-el-Fitr a faɗin ƙasar nan, Gwamnan Jihar Plateau, Mai Girma Barrista Caleb Manasseh Mutfwang, a ranar Litinin, 23 ga Maris, 2026, ya karɓi ziyarar gaisuwar Sallah daga ƙungiyar Jama’atu Nasril Islam (JNI) a Twin Theatre, sabon Gidan Gwamnati da ke Little Rayfield, Jos.
Ziyarar ta ba gwamnati da al’ummar Musulmi damar sake jaddada ƙudirin su na tabbatar da zaman lafiya, haɗin kai, da ci gaba mai ɗorewa a Jihar Plateau.
A jawabin sa, Gwamna Mutfwang ya jaddada muhimmancin ci gaba da riƙe darussa na ɗabi’a da ruhaniya da aka koya a watan Ramadan, inda ya bayyana cewa azumi na koyar da kyawawan halaye da ake buƙata domin bunƙasar al’umma.
Ya nuna fatan cewa waɗannan darussa za su dore, su inganta halayen jama’a tare da ƙarfafa su su zama masu tsoron Allah, tausayi, da kuma kishin haɗin kai da ci gaban jiha.
Karanta:Trump Ya Dakatar da Barazanar Harin Soji Kan Iran na Kwanaki Biyar
Gwamnan ya kuma yi nuni da muhimmancin hulɗa tsakanin addinai, inda ya bayyana cin abincin buɗa baki tare (Iftar) a matsayin alamar abota, amincewa da juna, da kuma zaman tare.
Ya ce ɗaya daga cikin manyan ƙalubalen bil’adama shi ne tsoron juna daga nesa, yana mai jaddada cewa kusantar juna na haifar da fahimta da zaman lafiya.
Da yake waiwayen tarihin Jihar Plateau, Gwamna Mutfwang ya amince da cewa an taɓa fuskantar matsaloli a baya, amma ya nuna kwarin gwiwa kan irin ci gaban da aka samu wajen rage bambance-bambance. Ya ambato maganar Martin Luther King Jr. cewa: “Dole ne mu koyi zama tare a matsayin ‘yan’uwa, ko kuma mu halaka tare a matsayin wawaye,” yana mai cewa al’ummar Plateau sun zaɓi hanyar zaman lafiya, haɗin kai, da ci gaba tare.
Ya kuma yi gargadi kan tashin hankali da ɗaukar fansa, yana mai cewa babu wata fa’ida mai ɗorewa da ake samu daga rikici ko zubar da jini.
A cewarsa, “Duk wata riba da aka samu ta hanyar tashin hankali ba za a iya tabbatar da ita ba,” yana kira ga jama’a su yi haƙuri, domin kodayake mutane na iya neman ramuwar gayya, Allah kaɗai ne mai yin hukunci da adalci.
Gwamnan ya yabawa shugabannin Musulmi kan rawar da suka taka wajen tabbatar da zaman lafiya a lokutan tashin hankali, ciki har da matsalolin tsaro da zanga-zanga da aka samu a baya-bayan nan. Ya ce matakan da suka ɗauka cikin gaggawa sun taimaka wajen hana rikici ya ƙara tsananta tare da ƙarfafa zaman lafiya a yankuna da dama, musamman a Dorowa.
Ya bayyana ƙwarin gwiwa cewa Jihar Plateau na da damar zama abin koyi wajen zaman lafiya tsakanin addinai daban-daban a Najeriya.
Gwamnan ya kuma bayyana cewa sama da mahajjata 1,100 daga jihar ana sa ran za su halarci aikin Hajjin 2026, inda gwamnati za ta ba su dukkanin tallafin da ya dace domin su cika ibadarsu tare da bayar da gudunmawa ga zaman lafiya da ci gaba.
A nasa jawabin tun da farko, Sarkin Wase kuma Shugaban JNI a Jihar Plateau, Mai Martaba Alhaji Muhammad Sambo, ya yabawa Gwamna Mutfwang kan salon shugabancinsa na haɗa kowa da kowa da kuma ƙoƙarinsa na inganta zaman lafiya da tsaro a jihar. Ya ce watan Ramadan na ƙarfafa darussan haƙuri, sadaukarwa, da tausayi, waɗanda suke da muhimmanci wajen gina al’umma mai ci gaba.
Ya kuma gode wa gwamnatin jihar kan tallafin kayan abinci da aka rabawa jama’a a watan Ramadan, wanda ya taimaka wa marasa galihu da dama. Haka kuma ya yaba da ayyukan gine-gine, musamman hanyoyi, da kuma bayar da motoci ga sarakunan gargajiya na matakin farko, yana mai cewa wannan alama ce ta cika alƙawuran dimokuraɗiyya.
Yayin da ya sake tabbatar da goyon bayan al’ummar Musulmi ga gwamnati, shugabannin JNI sun buƙaci ƙarin tallafin aiki, musamman samar da mota domin sauƙaƙa ayyukansu a matakin jiha da ƙananan hukumomi.
Taron ya ƙare da musayar goro, wanda ke nuna haɗin kai, abota, da kyakkyawar niyya.
Recent;Kotu ta yanke wa tsohon akanta janar hukuncin daurin shekaru 72 kan badakalar N868m