Daga Mustapha Abdullahi
Kwamandan Rundunar Yaki ta Joint Task Force North East Operation HADIN KAI, Manjo Janar Abdulsalam Abubakar, ya karrama jaruman jami’an soja da sojoji da suka sadaukar da rayukansu kwanan nan yayin gudanar da aikinsu.
A yayin jana’izar da aka gudanar a makabartar sansanin soji na Maimalari da ke Maiduguri, Jihar Borno, Manjo Janar Abubakar ya bayyana cewa wannan lokaci abin takaici ne wanda ke tunatar da mutane irin babban farashin da aikin soja yake da shi.
Ya ce a aikin soja akwai lokutan nasara da suke cike da alfahari, waɗanda ke nuna jarumtaka da haɗin kai da ke bayyana ruhin hidima.
Ya kuma ce akwai wasu lokuta masu cike da baƙin ciki waɗanda suke nauyi a zukata, kuma suna tuna wa mutane ainihin farashin da ake biya wajen yi wa ƙasa hidima.
Ya tabbatar wa iyalan jaruman da suka rasu cewa sadaukarwar da suka yi ba za ta tafi a banza ba, yana mai ƙara da cewa za a biya dukkan haƙƙoƙinsu cikin gaggawa.
Karanta:Hare-haren Borno: Za mu kawo ƙarshen ta’addanci da ƙarfin soja inji Shettima.
Kwamandan rundunar ya kuma miƙa ta’aziyya ga iyalan jaruman da suka rasu a madadin Babban Hafsan Tsaron Ƙasa, Babban Hafsan Sojojin Ƙasa da kuma duka Rundunar Sojojin Najeriya.
Gwamnan Jihar Borno, Farfesa Babagana Umara Zulum, wanda Babban Sakataren Asusun Tallafin Tsaro na Jihar Borno, Alhaji Mustapha Ali Yabe, ya wakilta, ya miƙa ta’aziyya ga Rundunar Sojojin Najeriya da kuma rundunar Operation HADIN KAI, inda ya bayyana rasuwar a matsayin babban rashi ga ƙasa.
Ya kuma yabawa sojojin kan jarumtaka, juriya da sadaukarwarsu wajen kare jihar.
Sannan ya tabbatar da cewa Gwamnatin Jihar Borno za ta ci gaba da tallafawa iyalan jaruman da suka rasu da kuma rundunar soji domin su ci gaba da sauke nauyin da kundin tsarin mulki ya ɗora musu.
Recent:Sojoji sun kashe ‘yan bindiga 45, sun rasa Kyaftin da sojoji biyu a Katsina.