Filato: Mutane 8 Sun Mutu, Wasu Sun Jikkata a Harin Bokkos.

Daga Mustapha Abdullahi Abubakar

‎Akalla mutane takwas ne aka tabbatar sun rasa rayukansu sakamakon wani hari da aka kai cikin dare a ƙauyen Mbwele da ke gundumar Kwatas, a ƙaramar hukumar Bokkos.

‎Lamarin ya faru ne da misalin ƙarfe 10:45 na dare ranar 9 ga Afrilu, 2026, lokacin da wasu ‘yan bindiga suka kutsa cikin al’ummar, suka buɗe wuta tare da ƙona gidaje, lamarin da ya jefa mazauna yankin cikin firgici.

‎An bayyana sunayen waɗanda suka rasu kamar haka: Habila Istifanus (38), Hassan Istifanus (31), Iliya Mangut (70), Sunday Gideon (31), Innocent Banabas (20), Lucky Titus (38), Wisdom Lucky (15), da Bwehsun Hassan (25).

‎Dukkan waɗanda abin ya shafa, ciki har da waɗanda suka jikkata, an kai su Asibitin Cottage na Bokkos domin samun kulawar lafiya bayan harin.

Karanta:Shettima ya jinjina wa Uba Sani kan bunkasa harkar sana’o’i da kere-kere, ya ce Kaduna ta cira tuta a Najeriya.

‎Ƙauyen Mbwele, wanda ke cikin unguwar Kwatas, bai wuce tafiyar mintuna 30 daga garin Bokkos ba, lamarin da ya haifar da damuwa a tsakanin mazauna yankin kan jinkirin kai ɗauki daga jami’an tsaro.

‎Mazauna yankin sun yi kira ga gwamnati da hukumomin tsaro da su gaggauta ɗaukar matakin da ya dace, yayin da fargaba ke ci gaba da addabar al’umma sakamakon wannan hari.

‎Wannan lamari ya sake ƙara tayar da hankula kan matsalar tsaro da ke ci gaba da addabar wasu sassan jihar Filato, musamman a yankunan karkara.

Recent:A Tattauna Da Boko Haram Don Sako Mana Mutane 416 Da Aka Kama – Ƙungiya A Borno.