Malami ya rasu ya na tsaka da koyarwa a jihar Kogi

Daga Mustapha Abdullahi

Wani malami a sashen gudanar da harkokin jama’a na Kwalejin fasaha ta jihar Kogi, Mista Anslem Ojodomo, ya rasu yayin da yake koyarwa a cikin aji.

Shugaban kwalejin, Farfesa Salihu Avidime, ya tabbatar da faruwar lamarin, inda ya bayyana mutuwar a matsayin babban abin jimami ga al’umma da iyalansa.

Rahotanni sun nuna cewa malamin ya fadi ne a lokacin da yake koyar da dalibai, inda aka garzaya da shi asibiti amma aka tabbatar da rasuwarsa.

Karanta:NNPP Kwankwasiyya za ta yi taron zaɓen shugabanni na jiha yayin da ake raɗe-raɗin sauya sheƙar Kwankwaso

Lamarin ya janyo fargaba a tsakanin dalibai da ma’aikata, musamman ganin cewa wannan na zuwa ne bayan mutuwar wani malami a kwalejin cikin kankanin lokaci.

Marigayin ya kasance kwararren malami mai jajircewa, wanda ya yi aiki a kwalejin tun shekarar 2021, tare da bayar da gudunmawa a fannoni daban-daban.

Kwalejin ta jajanta wa iyalansa tare da addu’ar Allah ya jikansa.

Recent:Dubban Amurkawa za su yi zanga-zangar adawa da mulkin Trump